साचाराने होरपळले फ्रान्स; १,००० हून अधिक अटकेत

फ्रान्सची राजधानी पॅरिससह देशभरात वाढत्या महागाई आणि शिक्षण क्षेत्रासाठी निधीचा अभाव या विरोधात गेल्या दोन आठवड्यांपासून आंदोलन सुरू आहे. विद्यार्थ्यांच्या मागण्यांवरून सुरू झालेल्या या आंदोलनाला आता हिंसक वळण लागले असून संपूर्ण फ्रान्समध्ये दंगलविरोधी पोलीस आणि आंदोलकांमध्ये तीव्र संघर्ष पाहायला मिळत आहे. रस्त्यांवर जोरदार घोषणाबाजी, जाळपोळ आणि दुकानांची लूटमार सुरू आहे. परिस्थिती नियंत्रणात आणण्यासाठी पॅरिसव्यतिरिक्त ल्योन, क्लेरमोंट-फेरांड आणि स्ट्रासबर्ग येथे पोलिसांनी अश्रुधुराच्या नळकांड्यांचा वापर केला, तर नीस आणि नांत येथे पाण्याचे फवारे सोडण्यात आले. शनिवारी प्रशासनाने आंदोलकांचा मार्ग पोर्ट डी'इटली ते पोर्ट डी विन्सेन्स या भागापुरता मर्यादित केला होता, तरीही काही आंदोलकांनी प्लेस डी ला नाझिओनकडे जाण्याचा प्रयत्न केला असता पोलिसांनी त्यांना रोखले.

गेल्या आठवड्यात घडलेल्या जाळपोळ, लूटमार आणि सार्वजनिक इमारतींवरील हल्ल्यांची पुनरावृत्ती टाळण्यासाठी फ्रान्स सरकारने कठोर पावले उचलली आहेत. देशभरात ७०,००० हून अधिक सुरक्षा कर्मचाऱ्यांची तैनाती करण्यात आली असून आकाशातून हेलिकॉप्टरद्वारे आणि जमिनीवर चिलखती वाहनांद्वारे सतत गस्त घातली जात आहे. जमावाला पांगवण्यासाठी पोलीस पाण्याचे फवारे आणि अश्रुधुराचा सातत्याने वापर करत आहेत. या व्यापक सुरक्षेदरम्यान आतापर्यंत १,००० हून अधिक उपद्रवी आंदोलकांना अटक करण्यात आली आहे.

देशातील बिकट परिस्थितीच्या पार्श्वभूमीवर राष्ट्राध्यक्ष इमॅन्युएल मॅक्रॉन यांनी जनतेला शांतता राखण्याचे आणि आंदोलने मागे घेण्याचे आवाहन केले आहे. समाजात फूट पाडणाऱ्या घटकांपासून सावध राहण्याचा सल्ला देत मॅक्रॉन यांनी मान्य केले की, गेल्या काही वर्षांतील विविध घटनांमुळे आणि पूर्वी झालेल्या हल्ल्यांमुळे प्रजासत्ताकाचा पाया हादरला असून धार्मिक मतभेद वाढले आहेत. त्यांनी नागरिकांना आवाहन केले की, एका बाजूला दुसऱ्या बाजूच्या विरोधात उभे करण्याच्या सापळ्यात अडकू नका. अजूनही उशीर झालेला नाही, आपले प्रजासत्ताक हे एकता आणि सलोख्यावर उभारलेले आहे, याची आठवण त्यांनी करून दिली. मात्र, राष्ट्राध्यक्षांच्या या आवाहनानंतरही आंदोलक माघार घेण्याच्या तयारीत नाहीत.

स्रोत: तरुण भारत — मूळ बातमी वाचा.