टीम इंडियाच्या धक्क्याने न्यूझीलंड संघात उलथापालथ!

भारताकडून सुरुवातीच्या दोन्ही टी-२० सामन्यांमध्ये पराभव पत्करावा लागल्यानंतर यजमान न्यूझीलंड संघ ०-२ असा मागे पडला आहे. मालिकेत पुनरागमन करण्यासाठी न्यूझीलंडसाठी आता उर्वरित सर्व सामने 'करो या मरो' असेच असणार आहेत. मात्र, या अत्यंत महत्त्वाच्या टप्प्यावर न्यूझीलंड संघाने आपल्या ताफ्यात मोठे बदल केले आहेत. स्टार वेगवान गोलंदाज मॅट हेन्री संपूर्ण टी-२० मालिकेतून बाहेर झाला आहे, तर लॉकी फर्ग्युसन आणि काइल जेमिसन यांच्या सहभागाबाबतही मोठी बातमी समोर आली आहे. भारत आणि न्यूझीलंड यांच्यातील ५ सामन्यांच्या टी-२० मालिकेतील तिसरा सामना मंगळवारी, २७ ऑक्टोबर रोजी वेलिंग्टन येथे खेळवला जाणार असून आगामी सामन्यांमध्ये न्यूझीलंडच्या गोलंदाजीची मोठी परीक्षा असणार आहे.

विशेष म्हणजे मॅट हेन्री, लॉकी फर्ग्युसन किंवा काइल जेमिसन हे खेळाडू दुखापतीमुळे बाहेर पडलेले नाहीत. न्यूझीलंड क्रिकेट बोर्डाने (NZC) स्पष्ट केले आहे की, आगामी व्यस्त वेळापत्रक पाहता 'प्लॅन्ड वर्कलोड मॅनेजमेंट' (Planned Workload Management) अंतर्गत या प्रमुख गोलंदाजांना विश्रांती देण्याचा निर्णय घेण्यात आला आहे. मॅट हेन्री ख्राइस्टचर्च येथेच थांबणार असून तो उर्वरित तिन्ही टी-२० सामन्यांमध्ये खेळणार नाही. तो थेट ४ नोव्हेंबर रोजी होणाऱ्या पहिल्या एकदिवसीय (ODI) सामन्यापूर्वी ऑकलंडमध्ये संघासोबत जोडला जाईल.

दुसरीकडे, लॉकी फर्ग्युसन २७ ऑक्टोबरला होणाऱ्या तिसऱ्या टी-२० सामन्याला मुकणार आहे; मात्र ३० ऑक्टोबर आणि १ नोव्हेंबर (हॅमिल्टन) रोजी होणाऱ्या चौथ्या व पाचव्या टी-२० सामन्यासाठी तो उपलब्ध असेल. काइल जेमिसनला तिसऱ्या सामन्यात संधी मिळू शकते, पण तो चौथ्या आणि पाचव्या टी-२० सामन्यात उपलब्ध नसेल. न्यूझीलंडने या बदलांच्या पार्श्वभूमीवर ब्लेअर टिकनरचा मालिकेतील शेवटच्या ३ सामन्यांसाठी संघात समावेश केला आहे. तसेच जोश क्लार्कसन शेवटच्या दोन सामन्यांसाठी उपलब्ध असेल, तर मॅट फिशरची तिसऱ्या टी-२० सामन्यासाठी कव्हर म्हणून संघात निवड करण्यात आली आहे.

स्रोत: तरुण भारत — मूळ बातमी वाचा.