टपाल कर्मचाऱ्यांना ६० दिवसांच्या वेतनाइतका बोनस

भारतीय टपाल विभागातील पात्र कर्मचाऱ्यांसाठी केंद्र सरकारने आर्थिक वर्ष २०२५-२६ साठी उत्पादकता आधारित बोनस (पीएलबी) मंजूर केला आहे. या निर्णयामुळे देशभरातील पात्र टपाल कर्मचाऱ्यांना ६० दिवसांच्या वेतनाइतका बोनस मिळण्याचा मार्ग मोकळा झाला आहे. मात्र, प्रत्येक कर्मचाऱ्याला मिळणारी प्रत्यक्ष रक्कम त्याचा सेवाकाल, पात्र वेतन आणि शासनाने निश्चित केलेल्या नियमांनुसार ठरणार आहे.

बोनसची गणना करताना मासिक पात्र वेतनाची कमाल मर्यादा सात हजार रुपये निश्चित करण्यात आली आहे. त्यानुसार सरासरी मासिक पात्र वेतनाला ६० ने गुणून ३०.४ ने भाग देऊन बोनसची रक्कम ठरवली जाणार आहे. या सूत्रानुसार सात हजार रुपये मासिक पात्र वेतन गृहीत धरल्यास कर्मचाऱ्याला सुमारे १३ हजार ८१६ रुपयांपर्यंत बोनस मिळू शकतो. ही रक्कम कमाल पात्र वेतनावर आधारित अंदाज आहे. त्यामुळे प्रत्येक कर्मचाऱ्याला मिळणारा बोनस त्याच्या पात्र वेतनानुसार वेगळा असू शकतो.

या योजनेचा लाभ मल्टी-टास्किंग स्टाफ (एमटीएस), गट ‘क’ तसेच पात्र अराजपत्रित गट ‘ब’ श्रेणीतील कर्मचाऱ्यांना मिळणार आहे. नियमित ग्रामीण डाक सेवकांनाही (जीडीएस) एक्स-ग्रेशिया स्वरूपात बोनस देण्यात येणार आहे. याशिवाय, काही निश्चित अटींची पूर्तता करणाऱ्या कंत्राटी आणि तात्पुरत्या कर्मचाऱ्यांसाठीही अॅड-हॉक बोनसची तरतूद करण्यात आली आहे.

तात्पुरत्या स्वरूपात काम करणाऱ्या पात्र कर्मचाऱ्यांसाठी सेवाकाल आणि कामाच्या दिवसांबाबत विशिष्ट निकष निश्चित करण्यात आले आहेत. संबंधित कर्मचाऱ्यांनी ३१ मार्च २०२६ पर्यंत सलग किमान तीन वर्षांची सेवा पूर्ण केलेली असणे आवश्यक आहे. तसेच, वर्षभरात किमान २४० दिवस काम केलेले असावे. पाच दिवसांचा आठवडा असलेल्या कार्यालयांतील कर्मचाऱ्यांसाठी किमान २०६ दिवस काम करण्याची अट आहे. या कर्मचाऱ्यांच्या बोनसची गणना करताना मासिक मजुरी १,२०० रुपये गृहीत धरण्यात येणार आहे.टपाल विभागाने या बोनससंदर्भातील आदेश १६ ऑक्टोबर २०२६ रोजी जारी केले आहेत. त्यामुळे पात्र कर्मचाऱ्यांना बोनस मिळण्याची प्रक्रिया निश्चित झाली असली, तरी प्रत्यक्ष बोनसची रक्कम त्यांच्या बँक खात्यात कोणत्या तारखेला जमा होणार, याबाबत अद्याप अधिकृत घोषणा करण्यात आलेली नाही. त्यामुळे कर्मचाऱ्यांचे लक्ष आता बोनस वितरणाच्या निश्चित तारखेकडे लागले आहे.

स्रोत: तरुण भारत — मूळ बातमी वाचा.